ကြက်ခြေထောက်ချဉ်စပ်
===============
ချဉ်စပ်လုပ်ဖို့အတွက် ကြက်ခြေထောက်တွေချည်း သီးသန့်ဝယ်လာပြီး ရေစင်အောင်ဆေးပြီးသန့်ရှင်းအောင် ပြုလုပ်ပါတယ်။
ပြီးရင် ရေနွေးဆူအောင် တည်ပြီး ကြက်သွန်ဖြူ၊ ဂျင်း၊ ဆား၊ အရသာမှုန့်ထည့်ပြီး ကြက်ခြေထောက်တွေကို ပြုတ်ပါတယ်။ ကြက်ခြေထောက်တွေ နူးလာရင် ဆယ်ထားပြီး အအေးခံထားပါတယ်။
မုန်လာဥနီ၊ မုန်လာဥဖြူ၊ သခွားသီး၊ တရုတ်နံနံ (အရွက်မပါစေပဲ အရိုးသီးသန့်) တို့ကို ရှည်ရှည်သွယ်သွယ် လှီးဖြတ်ထားပါတယ်။ (အရွက်ထည့်ရင် အရွက်တွေက အချဉ်မှာ အချိန်ကြာကြာစိမ်ရင် နွမ်းရိသွားတတ်လို့ပါ။ ) ဂျင်းကို ပါးပါးရှည်ရှည်လေးလှီး၊ ကြက်သွန်ဖြူ ပါးပါးလှီး၊ ငရုပ်သီးစိမ်း များများကို ပါးပါးလှီးထားပါတယ်။
ပြီးရင်တော့ အိုးတစ်ခုထဲကို ရှာလကာရည်၊ ရေကျက်အေး(ရေသန့်)၊ ဆား၊ သကြား အနည်းငယ်၊ စီချွမ် ငရုပ်ကောင်းစေ့ (ဟွားကျောင်း or မက်ခါးသီး) အရသာမှုန့် တို့ကို ထည့်ပြီး ကြက်ခြေထောက်၊ မုန်လာဥဖြူနီ၊ သခွားသီး၊ နံနံရိုးနဲ့ငရုပ်သီး၊ ဂျင်း၊ ကြက်သွန်ဖြူ အားလုံးကို ရောမွှေကာ ရေခဲသေတ္တာထဲ ထည့်ထားလိုက်ရင် ဒီနေ့ညလုပ်ထားပြီး မနက်ဖြန်မနက်ဆို မုန်လာဥတွေရော၊ ကြက်ခြေထောက်တွေရော အထဲကို ချဉ်စပ်စပ်အရသာဝင်သွားပြီး၊ ကျွတ်ဆတ်ဆတ်လေးနဲ့ အရမ်းကို စားလို့ကောင်းနေပါပြီ။
တကယ်လို့ မနက်ခင်းမှာ အချဉ်စိမ်ရင်တော့ နေ့လည်ပိုင်းလောက်ဆို စားနိုင်ပါတယ်။ မြန်မြန်စားချင်ရင် ရေခဲသေတ္တာထဲ မထည့်ပဲ ရိုးရိုးအခန်းတွင်း အပူချိန်မှာပဲ ထားပါ။ ဒါဆို မြန်မြန်ချဉ်ပါတယ်။
စားခါနီးမှာ ရှမ်းနံနံ ပါးပါးလှီး၊ သံပုရာသီးပါးပါးလှီး၊ အချဉ်အရသာ ပေါ့နေသေးရင် သံပုရာသီးလေးညှစ်တော့ သံပုရာနံ့လေးမွှေးတော့ ပိုစားကောင်းစေပါတယ်။ နှမ်းလှော်ထားတာရယ်၊ ငရုပ်သီး ဆီကြော်လေးရယ် ထပ်ထည့်ပြီး အရသာအပေါ့အငံ လိုသလို ပြန်ထည့်ပြီး စားနိုင်ပါပြီ။
အသီးအရွက်တွေရော ကြက်ခြေထောက်ရော အရသာကောင်းလှသလို အချဉ်ရည်လေးကလည်း အရသာအပြည့်ပါပဲ။
#မူရင် ရေးသားသူကို Credit ပေးပါသည်
Comments
Post a Comment