ကြက်အူဆီပြန်ဟင်း ***
ကြက်အူကို မညှီပဲ အနံ့လေး မွှေးနေအောင် ချက်ကြရအောင်...
ကြက်အူဆီပြန်လေးကို မဆလာနံ့လေး တသင်းသင်းနဲ့ မွှေးနေအောင် ချက်ထားပါတယ်။ စားနေချိန်မှာရော စားပြီးသွားရင်ရော လက်မှာ မဆလာအနံ့လေး သင်းပြီး ဆွဲနေအောင် ကောင်းလှပါတယ်..
ကြက်အူကို မညှီအောင် ဆေးရတာကတော့ လက်ဝင်ပါတယ်။ အချိန်လဲကြာတယ်။
ကြက်အူကို ဆေးမယ်ဆိုလျှင် ပထမဆုံး ဆားကြမ်း၊ ဆနွင်းနဲ့ခပ်ကြမ်းကြမ်းလေး နယ်ဆေးပြီး ရေများများနဲ့ ဆေးချပါ။
နောက်တထပ်ဆို ပဲမှုန့်အစိမ်းထည့်ပြီး လက်နဲ့ အားရပါးရနယ်ပြီး ဆေးပါ။
အညှိအရွဲတွေဟာ ပဲမှုန့်စိမ်းနဲ့အတူ ပါသွားပါလိမ့်မယ်။ ရေအေးနဲ့ပြန်ဆေးချပါ။ လေးငါးထပ်ပေါ့ ။
နောက်ဆုံးမှ ရေနွေးနွေးလေးထည့်၊ ရှာလကာရည် နှစ်ဇွန်းလောက် ထည့်ပြီး မြန်မြန်ဆေးချပါ။
စိမ်ပြီးဆေးလျှင် အချဉ်ဓာတ်တွေ စိမ့်ဝင်သွားမှာ ဆိုးလို့ပါ။
ပြီးရင်ရေနဲ့ အထပ်ထပ်ပြန်ဆေးရင် မညှီတော့ပါဘူး။ အားလုံး သန့်စင်သွားရင် ဆေးတဲ့ရေလေး ကြည်သွားတာ တွေ့ရပါမယ်။
အဲ့ဒီတော့မှ ထုံးပြီးချက်ချင်တယ်ဆိုရင်လည်း အူတွေကို အနေတော်အရှည်လေးတွေ ဖြတ်ပြီးထုံးပါ။
မထုံးချင်လည်း ကပ်ကြေးနဲ့ အနေတော်အပိုင်းလေးတွေ ဖြတ်ပါ။
ပြီးရင် ကြက်သားမှုန့်၊ ဆနွင်း၊ မဆလာ ထည့်နယ်ထားပါ။ ဆားမထည့့်ပါဘူး။
ကြက်သွန်နီဖြူ ၊ ချင်းကို ထောင်းထားပါ။
ငရုတ်သီးအပုတောင့်ကို ရေနွေးနဲ့ စိမ်ပါ။ ပွလာရင် အစေ့ထုတ် ညက်အောင် ထောင်းထားပါ။
စပါးလင်တပင်ကို အရိုးထုပြီး သေချာစည်းထားပါ။
ချက်လို့ရပါပြီ။ ဆီအိုးပူရင် ကြက်သွန်နီဖြူ၊ ချင်းထောင်းတာထည့်၊ ဆီသတ်ပြီး ကရဝေးရွက်ပါ တခါတည်း ထည့်ပါ။
အနံ့မွှေးရင် ဆနွင်း၊ ငရုတ်သီးထောင်းတာ ထည့်ပါ။
အရောင်လည်းလှ အနံ့လေး မွှေးနေပြီဆိုမှ ကြက်အူတွေကိုထည့်ပြီးမွှေပေးပါ။ ရေမထည့်ပါနဲ့။
ကြက်အူက သူ့ရေနဲ့သူ ထွက်လာတာ အများကြီးမို့လို့ ပါ။
စပါးလင် ထည့်ပြီး အဖုံးအုပ်ပေးထားပါ။ အိုးထဲ ဆီပြန်တဲ့ အသံကြားမှ အဖုံးဖွင့်ပါ။
အနံ့လေး အတော်မွှေးနေပြီဆိုရင် ရေထပ်ထည့့်ပြီး အူမနူးမချင်း တည်ပေးပါ။
အရသာအတွက် ဆားငံပြာရည်ကို ထည့်ပါ။
ဆီလည်းပြန် အူလည်းနူးပြီဆိုရင် စားရန်အသင့်ဖြစ်ပါပြီ။
အရမ်းမွှေးပြီး ခပ်စပ်စပ်လေးပေါ့။ညှီနံ့လည်းမရှိတော့ပါဘူး။
ထမင်းနဲ့စားရင် အရမ်းထမင်းမြိန်တဲ့ ဟင်းတခွက်ပါ။ ကြိုက်ရင် ချက်စားကြည့်နော်...
C. R. D
Comments
Post a Comment